Həbsdə olan keçmiş deputat Nazim Bəydəmirlinin ailəsi onun təcili xəstəxanaya köçürülməsini, normal müalicə almasını tələb edir. N.Bəydəmirlinin həyat yoldaşı Fəridə Bəydəmirli avqustun 5-də həbsdə onu ziyarət etdiyini, dərmanlar apardığını deyir.
"Üzünün rəngi qaralmış və çox halsız idi, demək olar, danışmağa taqəti yox idi. Hər gecə hərarətinin olduğunu bildirdi. Dayanmadan tərləyirdi. Saturasiyasını ölçdüm, 92-ə düşüb, ürək döyüntüsü 93 idi", – F.Bəydəmirli sosial şəbəkədə yazıb.
Penitensiar Xidmət keçmiş deputatın səhhəti ilə bağlı açıqlama yaymayıb.
4 avqust
Nazim Bəydəmirlinin həbsdə səhhətinin pisləşdiyi bildirilir
Keçmiş deputat Nazim Bəydəmirlinin həbsdə səhhətinin pisləşdiyi xəbər verilir. Bu haqda onun həyat yoldaşı Fəridə Bəydəmirli məlumat yayıb. Onun dediyinə görə, N.Bəydəmirlini müayinə edən həkim onun sətəlcəm olduğunu, təcili antibiotik müalicəsinə başlamaq gərəkdiyini söyləyib.
N.Bəydəmirli xəstələnməsini duş qəbul edəndən sonra cəzaçəkmə müəssisəsinin rəis müavininin onu kondisionerli otaqda saxlaması ilə izah edib. Rəis müavini keçmiş deputatın niyə sıra baxışına çıxmadığını soruşub, o isə izah edib ki, ürəyində "impulsiv blokada" olduğundan qanun kəskin isti havalarda, günəşin altında olmasına imkan vermir.
"Nazim ağır korona keçirib, ciyərləri 45 faiz yoluxmuşdur. Yenidən ciyərlərinin soyuqlaması onun həyatına son verə bilər", – həyat yoldaşı F.Bəydəmirli yazıb.
Məsələ ilə bağlı Penitensiar Xidmətdən münasibət almaq mümkün olmayıb.
N.Bəydəmirli 2023-cü ilin iyulundan həbsdədir. O, əmlaka sahib olmaq məqsədilə hədə-qorxu ilə tələb etmədə təqsirli bilinsə də, özü ittihamı uydurma adlandırıb. Ona 8 il həbs cəzası kəsilib. N.Bəydəmirli 2005-2010-cu illərdə Gədəbəy rayonundan Milli Məclisin üzvü olub. Keçmiş deputatın sözlərinə görə, 2023-cü ilin yayında Gədəbəyin Söyüdlü kəndində yerli əhalinin etirazları ilə bağlı kimisə qurban vermək lazım gəldiyindən onu seçiblər və bu üzdən, özünü "ekologiya məhbusu" adlandırır.
2023-cü ilin iyununda Söyüdlü sakinləri kənddəki qızıl zavodundan axan su vasitəsilə gölün zəhərlənməsinə və bunun da əhaliyə mənfi təsirinə etiraz ediblər. Həmin gün və sonradan saxlanan səkkiz nəfərə inzibati qaydada 20 günlük həbs cəzası verilib. Dörd nəfər kənd sakini haqqında isə narkotik ittihamı ilə cinayət işi başlanıb və onlar uzunmüddətli həbsə göndəriliblər.